Ҳџьынџьтәылатә еибашьраҿы ҳажәлар иргаз иҧшьоу Аиааира рыхәҭа ду алоуп ҳарҵаҩцәа-ҳааӡаҩцәа, азгәарҭоит Аҵара аусбарҭаҿы.
Урҭ ркаламқәа аганахь инышьҭаҵан ҳаҧсадгьыл ахақәиҭтәраз игылеит. Шьала икәабо ҳақалақь ахақәиҭреи ԥхьаҟатәи ҳԥеиԥши рхы ақәырҵеит аӡәырҩы.
Убас еиҧш иҟалоит аҧҭазаараҿы, еиҳа ианшәарҭоу аамҭазгьы, арҵаҩы дшырҵаҩу дырны, иҿыҧшыртә ихы аарҧшра анилиршо, иҵаҩцәа акласс уадаҿы иреиҳәоз ажәақәа, аҧсҭазаараҿы иара ихаҭа ианышьақәирӷәӷәо. Ус еиҧш рхаарҧшра рылшеит арҵаҩцәа, Аҧсны Аџьынџьтәылатә еибашьра аамҭаз.
«Ҳаҭыр зқәу, Аԥсны Аџьынџьтәылатә еибашьра иалахәыз ҳарҵаҩцәа! Шәара еиҳа ианыуадаҩыз аамҭазы, иаашәырҧшит ахачҳареи, агәаӷьреи, аҿырҧш бзиеи, аибашьра ашьҭахьгьы шәырҵаҩратә уалҧшьа нашәыгӡоит. Шәара шәыхьӡ мацарагьы ҳҿар мҩақәнаҵоит, шәфырхаҵара, шәгәымшәара ааӡагоуп! Хашҭра рықәымзааит Аҧсны зхы ақәызҵаз арҵаҩцәа! Хашҭра рықәымзааит ҳ-Аҧсадгьыл Аиааиреи Ахьыҧшымреи азаазгаз зегьы!» - аҳәоит Аҵара Аусбарҭа иҟанаҵаз адныҳәалараҿы.
