Аҟәатәи ақалақьтә еизара аилатәарахьы зкандидатура иахәаҧшраны иҟаз Беслан Ешба дихцәажәеит Аҧсны ахада иусбарҭа аиҳабы Алхас Кәыҵниа. Уи иазгәеиҭеит шыкәсык инацны Аҟәа ақалақь ахадас знапынҵақәа назыгӡо Беслан Ешба аамҭа цәгьа дшақәшәазгьы алҵшәа бзиақәа шыҟоу.
Аилатәара иалахәыз адепутатцәа Беслан Ешба иахь зҵаара рымамызт, иазгәарҭеит иусушьа бзиа шырбарҭо, уимоу ишырдыруа ихатә ҧарагьы шнихуа ақалақь аҿы имҩаҧысуа аҧсахрақәа рзы.
Регламентла ақалақь ахада ишьықәырӷәӷәара маӡалатәи абжьыҭиирала имҩаҧысроуп. Аҧхьаӡаратә комиссиа ахантәаҩы Нарсоу Салаҟаиа ирылаиҳәеит абжьыҭиира алҵшәақәа – 18–ҩык адепутатцәа ақәшаҳаҭхеит Беслан Ешба Аҟәа ақалақь ахадас иҟалара, биуллетенк ҧхасҭахеит.
Беслан Ешба адепутатцәа ҭабуп ҳәа реиҳәеит ирҭаз агәрагаразы, иагьазгәеиҭеит иара изы уи шҭакҧхықәра дуу.
Аҧсны ахада иусбарҭа аиҳабы Алхас Кәыҵниа иҳәеит Ақалақьтә еизареи Аҟәа ахадареи рҳәоуеиқәшәара ҟалар, русура алҵшәа ҳаракы аарҧшра ишазҳәахоу.